काठमाडौं: जुम्लाको सरकारी अस्पतालमा २० दिनदेखि अनशन बसेका डा. गोविन्द केसीलाई काठमाडौं ल्याईएको छ । बिहीबार डा. केसीलाई नेपाली सेनाको हेलिकोप्टरबाट काठमाडौ ल्याइएको गृहमन्त्रालयले जनाएको छ ।
मन्त्रालयले आज साँझ जारी गरेको एक विज्ञिप्ति अनुसार अनशनरत केसीको स्वास्थ्य अवस्था कमजोर हुँदै गएको भन्ने कर्णाली स्वास्थ्य विज्ञान प्रतिष्ठानका चिकित्सकहरुको सिफारिसका आधारमा उनलाई थप उपचारका लागि काठमाडौं ल्याइएको हो ।
उनलाई अहिले त्रिवि शिक्षण अस्पतालमा राखिएको छ । डा. केसीलाई अपरान्ह ३ बजेर ४० मिनेट जाँदा सेनाको हेलिकोप्टरमार्फत काठमाडौं ल्याइएको मन्त्रालयले जनाए पनि काठमाडौं भने साँझ ७ बजे ल्याईपुर्याएको छ ।
डा. केसीको स्वास्थ्य अवस्था गम्भीर बन्दै गएपछि सरकारले हेलिकोप्टरसहितको टोली बिहीबार बिहान जुम्ला पठाएको थियो । सुरुमा सरकारी टोली जुम्ला पुगेर केसीसँग छलफल गर्न खोज्दा केसी समर्थकले विरोध जनाउँदा झडप समेत भएको थियो । झडपपछि केसीले अस्पतालमा सरकारी धरपकडले थप समस्या आउने भन्दै बरु आफू काठमाडौ जान सहमत रहेको जनाएका थिए । मन्त्रालयले डा.केसीलाई लिन गएको टोलीलाई अस्पताल परिसरमा पस्न नदिएपछि झडप भएको दाबी गरेको छ ।
विज्ञप्तिमा भनिएको छः ‘सेनाको हेलिकोप्टरम कर्णाली प्रदेशका मुख्यमन्त्री, आन्तारिक मामिला तथा कानुमन्त्री, वार्ता टोली संयोजक शिक्षा, ज्ञिान तथा प्रविधि मन्त्रालयका सचिव खगराज बराल र चिकित्सकको टोली डा. केसीलाई भेट्न पुगेको थियो । निजलाई भेट्नका लागि उक्त टोली कर्णाली स्वास्थ्य विज्ञान प्रतिष्ठानमा पुगेकोमा सो प्रतिस्ठानका विद्यार्थी, कर्मचारी लगायतले भित्र पस्न नदिएको र सुरक्षाकर्मीमाथि हुलहुज्जत गरी प्रतिष्ठानको माथिल्लो तलाबाट सिसा, कुर्सी लगायतले सुरक्षाकर्मीमाथि प्रहार गरेको थियो ।’ सो क्रममा प्रहरी जवान कमल आचार्य घाइते भएका उनको अवस्था अहिले गम्भीर रहेको मन्त्रालयले जनाइएको छ ।
