काठमाडौं : नेपाली सेनाका उपरथी ईश्वर हमाल, संयुक्त राष्ट्रसंघको डिसइन्गेजमेन्ट अभजर्भर फोर्स (युएनडफ) को मिसन प्रमुख तथा फोर्स कमान्डर बनेका छन ।
सोही मिसनको कार्यवाहक प्रमुख तथा फोर्स कमान्डका रुपमा अक्टुबर २०१९ देखि कार्यरत् नेपालकै अर्का मेजर जनरल शिवराम खरेलको ठाउँमा हमाललाई दिइएको जिम्मेवारी संयुक्त राष्ट्रसंघका महासचिव एन्टोनिओ गुटेरेसले अनुमोदन गरेका हुन ।
साथै आफ्नो जिम्मेवारी कुशलताका साथ पुरा गरेकोमा जनरल खरेललाई राष्ट्रसंघीय महासचिव गुटेरेसले धन्यवाद दिएको राष्ट्रसंघले जारी गरेको विज्ञप्तिमा जनाइएको छ ।
खरेलको अवधि समाप्ती लगत्तै हमाललाई नियुक्ती गरिएको र सो नियुक्तीलाई महासचिवले अनुमोदन गरेका हुन ।
सन् १९८३ मा अफिसरको रुपमा हमाल नेपाली सेनामा प्रवेश गरेका थिए ।
राष्ट्रसंघको शान्ति मिशनमा पनि उनले सन् १९९० देखि ९१ सम्म, सन् १९९३–१९९४ सम्म, सन् २०००, र सन् २००६ देखि २००७ सम्म महत्वपूर्ण जिम्मेवारी पुरा गरेको राष्ट्रसंघले जनाएको छ।
त्रिभुवन विश्वविद्यालयबाट सार्वजनिक प्रशासनमा स्नातकोत्तर गरेका हमालले अमेरिकाको आर्मी वार कलेजबाट स्ट्राटेजिक स्टडिजमा स्नातकोत्तर पनि हासिल गरेका छन्।
