काठमाडौं : नेपालबाट विदेशमा जाने श्रमिकको संख्या यो वर्ष घटेको छ । गएको वर्षको तुलनामा यो वर्ष १४% ले घटेको तथ्यांकले देखाएको छ ।
खाडी राष्ट्रमा आएको आर्थिक मन्दीका कारण विदेशी श्रमबजारमा जाने युवाको संख्या घटेको वैदेशिक रोजगार विभागको तथ्यांकमा उल्लेख छ ।
आर्थिक वर्ष २०७४/७५ को तथ्यांक अनुसार कतारमा एक लाख ८३ हजार ५४२ युवा श्रमिकका रुपमा पुगेका थिए भने गत आर्थिक वर्ष २०७५/७६ को असारसम्म एक लाख ६१ हजार २१५ गएका छन ।
त्यस्तै मलेसियामा आव २०७४/७५ मा एक लाख ३७ हजार ३११ जना गएको रेकर्ड थियो भने यो वर्ष ४२ हजार १४६ जना मात्रै श्रमका लागि गएको पाइएको छ ।
मलेसियाका सन्दर्भमा सरकारले कामदार पठाउँदा ठगी भएको भन्दै जेठ महिनाबाट त्यहाँ जान नयाँ कामदारलाई रोक लगाएपछि वैदेशिक रोजगारीमा जाने कामदारको संख्यामा ठुला अन्तर देखिएको हो ।
त्यसैगरी कतारमा गत आवमा एक लाख ८३ हजार ५४२ रहँदा यो वर्ष एक लाख ६१ हजार २१५ पुगेको छ ।
यसैबीच साउदी अरेबियामा एक लाख आठ हजार ४१४ जनाले गत आवमा श्रम स्विकृती पाएका थिए भने यस साल यो संख्या बढेर एक लाख १७ हजार ९०४ पुग्यो ।
अनि कुवेतमा २७ हजार १४९ जना गत वर्ष गएका थिए भने यो सालमा २५ हजार ९९६ जना श्रमिक त्यहाँँ पुगे ।
त्यस्तै ओमानमा भने यो वर्ष ५% ले कामदार जाने क्रम घटेको छ ।
यी मूलुकमा कामदारको संख्या घटेपनि अन्य केहीमा भने यो वर्ष श्रमिकको लर्को नै लाग्यो ।
त्यसैगरी युएईमा गत आवमा एक लाख १४ हजार ९४१ रहँदा यो वर्ष एक लाख १९ हजार ८५५ जना त्यहाँ पुगे ।
गत आवको तुलनामा यो वर्ष बहराइनमा २.५%, दक्षिण कोरियामा ५.४%, अफगानिस्तानमा २१% तथा जापानमा १८.४% बढी युवा विदेशिएका छन ।
मलेसिया, कतार, साउदी अरेबिया, युएई, कुवेत, बहराइन, ओमान, दक्षिण कोरिया, लेबनान, इजरायल, अफगानिस्तान तथा जापान, नेपाली श्रमिकका लागि प्रमुख गन्तव्य मूलुकहरु रहेका छन ।
