काठमाडौं : बम उत्पादन, कर्तव्य ज्यान र ज्यान मारेको उद्योग गरेको अभियोगमा पक्राउ परेका कांग्रेस नेता तथा ‘निलम्बित’ सांसद मोहम्मद अफताव आलमको बयान शुरु भएको छ ।
जिल्ला अदालत रौतहटमा उनको सुरुवाती बयान भइरहेको छ ।
जिल्ला अदालत रौतहटका श्रेस्तेदार गुणराज पराजुलीले आलमको बयान शुरु भएको जानकारी दिएका छन ।
जिल्ला न्यायाधीश दीपक ढकालको इजलाशमा आलमको बयान शुरु भएको पराजुलीले जानकारी दिए ।
आलममाथि २७ चैत २०६४ मा बम विस्फोट गराइ बम विस्फोटमा घाइते भएका व्यक्तिलाई इटाभट्टामा जलाएर कर्तव्य ज्यान गरी मारेको आरोप लागेको छ ।
जिल्ला सरकारी वकिलको कार्यालय रौतहटले सोमबार आलमसहितका १० जनाविरुद्ध कर्तव्य ज्यान, ज्यान मार्ने उद्योग र विस्फोटक पदार्थ उत्पादन तथा ओसापोसारसम्बन्धी कसुरमा आजीवन काराबासको मागदाबी गर्दै अभियोग पत्र दायर गरेको थियो ।
उक्त मुद्दामा अभियुक्त बनाइएकामध्ये आलमबाहेकका अन्य सबै फरार छन् ।
