काठमाडौं : नेपाल कम्युनिष्ट पार्टी अध्यक्ष पुष्पकमल दाहाल प्रचण्डको अध्यक्षतामा अहिले सचिवालय बैठक बसिरहेको छ ।
पहिलो वरीयताका अध्यक्ष केपी शर्मा ओलीसँगको परामर्शपछि उनले सचिवालय बैठक बोलाएका हुन ।
केहीबेर अघिबाट नेकपा केन्द्रीय कार्यालय धुम्बाराहीमा सुरुसचिवालय बैठकमा प्रधानमन्त्री ओली भने सहभागी भएका छैनन् ।
स्वास्थ्यका कारण धेरै दौडधूप गर्न नमिल्ने चिकित्सकको सल्लाहपछि ओलीसंगको परामर्शमा नै अध्यक्ष प्रचण्डले बैठक बोलाएको एक नेताले बताएका छन ।
कार्यकारी अधिकारसहितको अध्यक्ष भएपछि प्रचण्डले पहिलो बैठक पनि धुम्बाराहीमै राखेका थिए । त्यसबेला ओली अस्पतालमै थिए ।
नेकपा स्रोतका अनुसार, बैठकको अध्यक्षता गरे पनि प्रचण्डले एजेण्डाहरु ओलीलाई जानकारी गराइसकेका छन् । प्रचण्डले पार्टी एकीकरणका बाँकी काम टुंग्याउँदै जनपरिचालनसहितको पाँचमहिने कार्ययोजनासमेत तयार पारेका छन् । यसबारेमा पनि उनले ओलीसहित मुख्य नेताहरुसँग छलफल गरेका छन् ।
जारी बैठकको उपनिर्वाचनको रिपोर्टमाथि गहन छलफल भइरहेको छ ।
सचिवालयकै निर्देशन अनुरुप आइतबार उपचुनावको समीक्षात्मक रिपोर्ट पार्टी मुख्यालय पुर्याइएको थियो ।
मंसिर १८ गते अध्यक्ष पुष्पकमल दाहाल ‘पचण्ड’को अध्यक्षतामा बसेको सचिवालय बैठकको निर्देशन अनुसार मंसिर १४ गते उपचुनाव भएका ५२ स्थानकै रिपोर्ट हिजो आइतबार पार्टी मुख्यालय पुर्याइएको हो ।
उपचुनाव भएका ३७ जिल्लाका ५२ स्थानकै रिपोर्ट नेकपा पार्टी कार्यालयमा आइसकेको छ।
समीक्षा रिपोर्टमा कतिपय नसोचेको स्थानमा नेकपाले जितेको तथा गढ मानिएकै ठाउँमा नेकपाले पराजय भोगेको विषयलाइ समेटिएको छ ।
सचिवालय बैठकले स्थायी कमिटी बैठक बोलाउनेबारेमा पनि छलफल गर्नेछ । वामदेव गौतमलाई उपाध्यक्ष बनाउने सचिवालयको प्रस्ताव स्थायी कमिटी बैठक नबसेका कारण कार्यान्वयन भएको छैन ।
