काठमाडौं : नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्डले राष्ट्रिय हितलाई केन्द्रमा राखेर एमसीसीबारे निर्णय लिने बताएका छन ।
प्रचण्डले एमसीसीको अध्ययन कार्यदलले बुझाएको प्रतिवेदन जस्ताको तस्तै पारित हुन्छ भन्ने भ्रम नपाल्न समेत आग्रह गरेका छन ।
आज बुधबार पोखरामा प्रेस संगठनले गरेको पत्रकार सम्मेलनमा बोल्दै अध्यक्ष प्रचण्डले कार्यदलले बुझाएको प्रतिवेदन पार्टीमा छलफल गरेपश्चात मात्रै पारितका लागि संसदमा पठाइने जानकारी दिएका छन ।
नेकपाले एमसीसीबारे अध्ययन गर्न पार्टीका वरिष्ठ नेता झलनाथ खानलको संयोजकत्वमा स्थायी समिति सदस्य भीम रावल र परराष्ट्रमन्त्री प्रदीप ज्ञवाली रहेको तीन सदस्यीय अध्ययन कार्यदल गत आइतबार गठन गरेको थियो ।
‘एमसीसी बारे केन्द्रीय समितिमा सबै समूहमा व्यापक छलफल भयो’, पूर्वप्रधानमन्त्री समेत रहेका प्रचण्डले , ‘केन्द्रीय सदस्यहरुले आफूहरुले राम्रोसँग हामीले बुझ्न र जनतालाई पनि बुझाउनु प¥यो भनेका कारण सचिवालयले कार्यदल बनाएको हो । कसैबाट पनि ठाडै स्वीकार र अस्वीकार भएको छैन।’
छोटो समयमा सबैलाई बुझाउने गरी प्रतिवेदन तयार गर्नका लागि कार्यदल बनाएको बताए।
उनले भने, ‘हामी राष्ट्रिय हित अनुकुल सत्य तथ्यको गहिरो अध्ययन अनुसन्धान गरेर अगाडि बढ्छौं।’
