काठमाडौँ: चालु आर्थिक वर्षको नौ महिना अर्थात साउनदेखि चैतसम्ममा मुलुकको कूल व्यापार घाटा पौने ११ खर्ब रूपैयाँ पुगेको छ ।
भन्सार विभागले सार्वजनिक गरेको गत चैतमसान्तसम्मको विवरण अनुसार व्यापार घाटा १० खर्ब ८३ अर्ब २२ करोड ९० लाख २९ हजार पुगेको छ ।
गत वर्षको सोही अवधिमा नेपालले १३ खर्ब ६ अर्ब ८ करोड ९० लाख ९१ हजार रुपैयाँको व्यापार घाटा व्यहोरेको थियो । व्यापार घाटामा गत आर्थिक वर्षको यसै अवधिको तुलनामा १७.०६ प्रतिशतले कमी आएको हो ।
नौ महिनाको अवधिमा देशको कूल व्यापार १३ खर्ब १९ अर्ब ७८ करोड ८९ लाख बराबर भएको विभागले जनाएको छ । यस्तै, सो अवधिमा कूल ११ खर्ब १ अर्ब ५० करोडको आयात हुँदा एक खर्ब १८ अर्ब २७ करोड रूपैयाँ बराबरको मात्र निर्यात भएको छ।
आर्थिक वर्ष २०७८/७९ को तुलनामा चालु आवको ९ महिनामा कूल व्यापार १८.८९ प्रतिशतले घटेको छ । गत आवमा कूल १६ खर्ब २७ अर्ब २३ करोड बराबरको व्यापार भएको थियो ।
गत आवमा १४ खर्ब ६६ अर्ब ६६ करोड रुपैयाँ बराबरको माल वस्तु आयात भएकोमा चालु आवको ९ महिनामा १८.०८ प्रतिशतले कमी आई १२ खर्ब १ अर्ब ५० करोड रुपैयाँ बराबरको माल सामान आयात भएको हो ।
यस्तै, गत आवको ९ महिनामा एक खर्ब ६० अर्ब ५७ करोड बराबरको माल वस्तु निर्यात भएकोमा चालु आवको ९ महिनामा २६.३४ प्रतिशतले ओरालो लागेर एक खर्ब १८ अर्ब २७ करोड बराबरको वस्तु निर्यात भएको हो।
