काठमाडौँ:
गृहमन्त्री रमेश लेखकले मनसुनजन्य विपद् प्रभावितहरुको पहिचान गरी सरकारलाई तत्काल नाम उपलब्ध गराउन स्थानीय तहलाई निर्देशन दिएका छन्।
शनिबार मन्त्रालयलमा ३० दिनदेखि अनसनरत दीपक सिलवालको अनसन तोडाउने कार्यक्रममा बोल्दै गृहमन्त्री लेखकले स्थानीय तहले विपद् प्रभावितहरुको नाम पहिचान गरेर पठाएको तीन दिनभित्रै अस्थायी आवास बनाउनका लागि रकम उपलब्ध गराउने समेत दाबी गरे।
‘हामीले मृतकका परिवारलाई दुई लाख रुपैयाँ राहत दिने निर्णय गरेर सम्बन्धित जिल्लाहरुमा पैसा पठाइसकेका छौँ,’ उनले भने, ‘चाँडो भन्दा चाँडो घरमै गएर पीडित परिवारलाई राहत दिने निर्णय भएको छ। तदनुरुप राहत दिने काम भइरहेको छ। घाइतेको स्वास्थ्यलाभको लागि अस्पतालमा निःशुल्क उपचार गर्ने निर्णय गरेका छौं। ज्यादा नोक्शानी भएका ठाउँहरुमा संकटग्रस्त क्षेत्र भनेर तोकेका छौं। त्यसमा राज्यले सम्पूर्ण ध्यान केन्द्रित गर्नेछ। उद्धार, राहत, पुनःनिर्माण, पुर्नस्थापनाको सवालमा पूर्णरुपले क्षति भएका घरको लागि तत्काल अस्थायी आवास बनाउन रकम निकासा गर्नेकुरा अघि बढेको छ। म सबै स्थानीय तहलाई के आग्रह गर्न चाहन्छु भने चाँडो भन्दा चाँडो लाभग्राही पहिचान गरेर पठाइदियो भने पहिचान भएर आएको तीन दिनभित्र अस्थायी आवास बनाउनका लागि रकम उपलब्ध गराउन सक्छौँ।’
