अन्यसँग पनि लिए गुनासा
१३ माघ, काठमाडौँ।
गृह मन्त्री ओम प्रकाश अर्यालले काठमाडौंमा रहेका दुई कारागार कार्यालयहरु केन्द्रीय कारागार कार्यालय जगन्नाथदेवल र कारागार कार्यालय डिल्लीबजारका साथै केन्द्रीय कारागार अस्पताल त्रिपुरेश्वरको स्थलगत निरीक्षण गर्नुभयो।
गृह सचिव, गृह मन्त्रालयको शान्ति तथा सुरक्षा महाशाखाका प्रमुख, कारागार व्यवस्थान विभागका महानिर्देशक, नेपाल प्रहरीका प्रहरी नायव महानिरीक्षक लगायत उच्च अधिकारीको टोली लिई कारागार निरीक्षणको लागि पुग्नुभएका मन्त्री अर्यालले दुई कारागार कार्यालयहरु र एक कारागार अस्पतालको निरिक्षणको क्रममा कारागारहरु र अस्पतालको वस्तुस्थितीबारे जानकारी लिई गर्नुपर्ने आवश्यक सुधारको लागि निर्देशन दिनुभएको हो।
मन्त्री अर्यालले केन्द्रीय कारागार कार्यालय जगन्नाथदेवलमा रहेका केन्द्र, भद्र र महिला सुधार गृहको निरीक्षण गर्नुभई त्यहाँ राखिएका कैदिबन्दीसँग भेट गरी उनीहरुका पीरमर्का, गुनासाहरुबारे जानकारी लिनुभयो।त्यस्तै कारागार कार्यालय डिल्लीबजारका महिला र पुरुष ब्लकहरुमा पुगी त्यहाँ राखीएका बन्दीहरुसँग समेत भेटघाट गर्नुभई राज्यका तर्फबाट बन्दीहरुलाई उपलब्ध गराईएका सुविधा प्राप्तिको अवस्थाबारे चासो व्यक्त गर्नुभयो।
निरीक्षणको क्रममा सम्बन्धित कारागारका कारागार प्रशासकहरुले कारागारको क्षमता, भौतिक अवस्था बन्दीहरुको संख्या लगायतबारे मन्त्री अर्याललाई जानकारी गराउनुभयो। मन्त्री अर्यालले कारागारमा रहेका वृद्ध तथा दीर्घरोगी बन्दीहरुको सम्बन्धमा चिन्ता र चासो व्यक्त गर्नुभई उनीहरुको सजाय भुक्तानका सम्बन्धमा कानून अनुसार प्राप्त हुने राहत उपलब्ध गराउनुपर्ने धारणा व्यक्त गर्नुभयो।
सो क्रममा मन्त्री अर्यालले केन्द्रिय कारागारमा रहेका भुटानी शरणार्थी काण्डमा मुछिएका टोप बहादुर रायमाझी, यस्तै अन्य मुद्दामा जेल चलान भएका राजेश अहिराज र दिपक मनांगेसँग पनि केहीबेर कुराकानी गरेका थिए ।
मन्त्री अर्यालले कारागारहरुको निरीक्षण पश्चात बन्दीगृहमा मानव अधिकारको प्रत्याभूतीमा कुनै सम्झौता नगर्न सम्बन्धित अधिकारीलाई निर्देशन दिनुभयो।त्यस्तै मन्त्री अर्यालले कारागार कार्यालयहरुको भौतिक पुर्वाधार सुधार तथा अत्यावश्यक सेवाको उपलब्धताको लागि मन्त्रालयको तर्फबाट पूर्ण सहयोगको प्रतिवद्दता व्यक्त गर्नुभई कारागार व्यवस्थापन विभाग मार्फत कारागार कार्यालयहरुको सुधारको मार्गचित्र यथासिघ्र मन्त्रालयमा पेश गर्न सम्बन्धित कारागार प्रशासकहरुलाई निर्देशन दिनुभयो।
केन्द्रीय कारागार अस्पताल त्रिपुरेश्वरको निरीक्षण गरी मन्त्री अर्यालले अस्पतालमा उपचाररत बन्दीहरुको स्वास्थ्य अवस्थाबारे जानकारी लिई अस्पतालको सेवालाई थप सुदृढ बनाउने प्रतिवद्धता व्यक्त गर्नुभयो।
