रौतहट: रौतहटमा आइतवार एक अन्दाजी ४० वर्षीया महिला मृतावस्थामा फेला परेकी छन् । गढीमाई नगरपालिका–३ लक्षमीपुरकी मिन्त्री देवीको शव गाँउछेउकै उखुुघारीमा फेला परेको प्रहरीले जनाएको छ ।
कुटपिट गरी लुगाको सलले घाँटी कसेर हत्या गरिएको अवस्थामा मिन्त्री देवीको शव फेला परेको जिल्ला प्रहरी प्रवक्ता डिएसपी भरत श्रेष्ठले जानकारी दिए ।
घटना प्रकृति हेर्दा बलात्कारपछि हत्या भएको हुनसक्ने प्रहरीको आशंका रहेको डिएसपी श्रेष्ठले बताए । महिलाको हत्याको अनुसन्धान गर्न आवश्यक जनशक्ति परिचालन गरिएकाले तत्कालै हत्याको कारण यकिनका साथ भन्न सकिने अवस्था भने नरहेको प्रवक्ता श्रेष्ठको भनाई छ ।
हाल घटनास्थललाई सुरक्षित राखेर मुचुल्का उठाउने काम भइरहेको प्रवक्ता श्रेष्ठले बताए ।
यसरी साउनको अन्तिम र भदौको दोश्रो हप्ताभित्र रौतहटमा तीन जनाको हत्या भैसकेको छ। साउन ३२ गते जिंगडियाका २२ वर्षीय निरञ्जन रामको धारिलो हतियारले घाँटी रेटेर हत्या गरेको अवस्थामा शव बरामद भएको थियो ।
यस्तै गत भदौ ३ गते राति ९ बजे खेसरहियाका हनुमान मंदिरका पुजारी ७० बर्षिय श्रीराम साहको पनि हत्या भएको थियो ।
