काठमाडौँ: प्रधानमन्त्री पुष्पकमल दहाल प्रचण्डले बैंकहरुको मर्जरबाट विकास निर्माणका ठूला परियोजनाहरुमा लगानी गर्न सहज हुने बताएका छन्।
ग्लोबल आइएमई बैंक र बैंक अफ काठमाण्डूको एकीकृत कारोबार शुभारम्भ कार्यक्रमको औपचारिक उद्घाटन गरेपछि सोमबार सम्बोधत्रनका कार्यक्रममा प्रधानमन्त्री प्रचण्डले यस्तो बताएका हुन्।
‘बैंक तथा वित्तीय संस्था मर्जर लगायताका कृयाकलापले ठूला परियोजनामा श्रोत जुटाउन सहज हुनेछ’, उनले भने, ‘यसले अझ बढी वित्तीय दक्षता बढ्ने छ। अर्कातिर वित्तीय क्षेत्रमा देखिने अस्वस्थ प्रतिस्पर्धा पनि हटेर जाने छ।’
उनले सम्बोधनका क्रममा बैंकहरु ठूलो हुँदै जाँदा नागरिकको पहुँचमा कमी आउन दिन नहुने पनि बताए।
‘बैंक तथा वित्तीय संस्थान देशका आर्थिक क्षेत्रका खम्बा हुन्। वित्तीय साक्षरता र स्वरोजगारमा पनि लगानी बढ्ने विश्वास छ’, उनले भने, ‘हाम्रो जस्तो विकाशशील देशमा निजी क्षेत्रको ठूलो भूमिका छ।’
उनले ग्लोबल आईएमई र बैंक अफ काठमाण्डूलाई यहाँसम्म ल्याएर देशकै ठूलो बैंक बनाउनु चानचुने कुरा नभएको बताए।
‘सबैलाई मिलाएर यहाँसम्म आइपुग्नु नै ठूलो कुरा हो। देशकै ठूलो बैंक बनाउन दुवै बैंकको यो योगदान छ’, उनले भने, ‘यो पक्कै सजिलो काम होइन। तपाईंहरुले धेरै उतारचाढ पार गर्नुपर्यो। यो हाम्रो राष्ट्रका लागि महत्वपूर्ण कदम हो। यो मर्जरले देशले अझै बलियो, थप विविध र गतिशील बैंकिङ क्षेत्र पाउने छ।’
प्रधानमन्त्री प्रचण्डले नयाँ सरकार गठनसँगै पुँजीबजार र अर्थतन्त्रमा देखिएको आशालाई विश्वासमा बदल्ने प्रतिबद्धता समेत व्यक्त गरेका छन्।
‘दिगो आर्थिक विकास र अर्थतन्त्रको सबलीकरण सरकारको प्राथमिकतामा पर्नेछ’, उनले भने, ‘अर्थतन्त्रलाई वित्तीय, औद्योगिक र मौद्रिक नीतिको सन्तुलित कार्यान्वयनबाट माथि उकासिनेछ।’
सरकार गठनलगत्तै अर्थतन्त्र सुधारलाई आफूहरुले प्राथमिकतामा राखेको र अर्थमन्त्री, राष्ट्र बैंकका गभर्नर र आफू सँगै बसेर निजी क्षेत्रले भोगिरहेको समस्या समाधानका लागि केही सहजीकरण गरेको स्मरण गर्दै प्रचण्डले यस्तो प्रयास र अभ्यास निरन्तर रहने पनि बताए।
मर्जर नीतिले वित्तीय प्रणाली थप सुरक्षित बन्दै
नेपाल राष्ट्र बैंकका गभर्नर महाप्रसाद अधिकारी मर्जर नीतिले वित्तीय प्रणाली थप सुरक्षित बन्दै गएको बताएका छन्।
खुला नीतिका कारण धेरै वित्तीय संस्था खुलेको गर्भनर अधिकारीको भनाइ थियो। ‘संस्था बढी हुँदा बित्तिय मध्यस्था लागत बढ्छ’, उनले भने, ‘जसका कारण बजारमा अस्वस्थ प्रतिस्पर्धा भयो। अर्थतन्त्रमा पनि सकारात्मक योगदान भएन।’
‘अहिलेसम्म २४७ संस्था मर्ज भएर ६८ संस्था कायम भएका छन्’, उनले भने, ‘ वित्तीय मध्यस्थताको लागत पनि घट्दै गएको छ। वित्तीय प्रणाली पनि थप सुरक्षित हुँदै गएको छ।’
