काठमाडौँ । प्रधानमन्त्री पुष्पकमल दाहाल ‘प्रचण्ड’ले संयुक्त राष्ट्रसंघका महासचिव एन्टोनियो गुटेरेसको भ्रमणको बेला केही दलका नेताले शान्ति प्रक्रियाको विषयमा फरक धारणा राखेर देश विभाजित रहेको सन्देश दिन खोजेको भन्दै असन्तुष्टि जनाएका छन् ।
संसदमा महासचिव गुटेरेसको सम्बोधनपछि संसद भवनबाट बाहिरिने क्रममा माओवादी केन्द्रका अध्यक्ष समेत रहेका प्रधानमन्त्री प्रचण्डले महासचिवले नेपालको संसदमा आएर बोल्नु नेपालीका लागि खुसी र गर्वको विषय भए पनि नेपालकै नेताहरूले शान्ति प्रक्रियाबारे फरक धारणा राखेकोमा असन्तुष्टि जनाएका हुन् ।
उनले भने, ‘नेपालको शान्ति प्रक्रियालाई पूर्णता दिने कुरामा उहाँको पुरै सहयोग रहन्छ भन्नेमा म विश्वस्त छु । नेपालको शान्ति प्रक्रियाको बारेमा अन्तर्राष्ट्रिय समुदाय र संयुक्त राष्ट्र संघका महासचिवको यति राम्रो धारणा छ । तर दुर्भाग्य हाम्रै केही नेता साथीहरूले यस्तो बेलामा देश विभाजित देखाउनुभयो त्यो दुर्भाग्य हो ।’
महासचिव गुटेरेससँगको भेटमा एमाले अध्यक्ष केपी ओलीले प्रधानमन्त्री प्रचण्ड नै द्वन्द्व भड्काउने गतिविधिमा लागेको आरोप लगाएका थिए । प्रधानमन्त्री प्रचण्डले ओलीको सोही अभिव्यक्तिलाई लिएर असन्तुष्टि जनाएका हुन् ।
